no comments

सरकारको कोरोना नियन्त्रणमा १३ अर्ब खर्च, केमा कति खर्च ?

काठमाडौं, ५ भदौ/ कोरोना भाइरस संक्रमणको रोकथाम तथा नियन्त्रणमा सरकारले १३ अर्ब ३६ करोड रुपैयाँ खर्च भएको जनाएको छ ।

संघीय सरकार, प्रदेश सरकार र स्थानीय तहले समेत साउन मसान्त सम्म १३ अर्ब ३६ करोड रुपैयाँ खर्च भएको सरकारका प्रवक्ता डा. युवराज खतिवडाले जानकारी दिए ।

खर्चमध्ये संघीय सरकारका तर्फबाट ५ अर्ब ८५ करोड, प्रदेश सरकारको तर्फबाट १ अर्ब ३ करोड र स्थानीय तहहरुबाट ६ अर्ब २ करोड रुपैयाँखर्च भएको खतिवडाले जानकारी दिए ।

संघीय सरकारले खर्च गरेको रकममध्ये स्वास्थ्य तथा जनसंख्या मन्त्रालयले २ अर्ब १७ करोड, रक्षा मन्त्रालयले २ अर्ब ३७ करोड, गृह मन्त्रालयले २० करोड ८३ लाख, संस्कृति, पर्यटन तथा नागरिक उड्डयन मन्त्रालयबाट ४ करोड ४९ लाख, शहरी विकास मन्त्रालयबाट १ करोड, कोरोना कोषबाट १ अर्ब ३ करोड, परराष्ट्र मन्त्रालयबाट ६ लाख रुपैयाँखर्च भएको जानकारी दिए ।

प्रदेशहरुले गरेको खर्चमध्ये प्रदेश १ ले २० करोड ७१ लाख, प्रदेश २ ले १७ करोड २ लाख, बागमती प्रदेशले १३ करोड ६७ लाख, गण्डकी प्रदेशले १४ करोड ५४ लाख, प्रदेश ५ ले १० करोड ५९ लाख, कर्णाली प्रदेशले २६ करोड २६ लाख र सुदूरपश्चिम प्रदेशले ४२ करोड ४८ लाख खर्च गरेको समेत जनाइएको छ ।

यस्तो खर्च औषधि र स्वास्थ्य सामाग्री, स्वास्थ्य पूर्वाधार, जनशक्ति परिचालन, क्वारेन्टिन र अन्य क्षेत्रमा खर्च भएको उल्लेख गरिएको छ । नेपाल सरकारले खोलेको कोरोना संक्रमण रोकथाम तथा नियन्त्रण कोषमा २ अर्ब ७५ करोड रुपैयाँजम्मा भएकोमा यसबाट १ अर्ब २० करोड रुपैयाँखर्च भएको उनले बताए ।

TechSansar.com - Technology Navigator website for Nepalese